அடுத்த அகவிலைப்படி உயர்வு 6% வரை இருக்கலாம் என்று தகவல்கள் தெரிவிக்கின்றன. அதாவது, அகவிலைப்படி 4% முதல் 6% வரை உயரக்கூடும் எனக் கூறப்படுகிறது. இந்த உயர்வு ஜூலை மாதத்தின் இரண்டாவது வாரத்தில் உறுதி செய்யப்படும் என எதிர்பார்க்கப்படுகிறது. தொழிலாளர்களுக்கான அகில இந்திய நுகர்வோர் விலைக் குறியீட்டு எண் (AICPI-IW) மே 2025-இல் 0.5 புள்ளிகள் உயர்ந்து 144 ஆக உள்ளது.
இந்தக் குறியீட்டு எண் மார்ச் முதல் மே வரையிலான மூன்று மாதங்களில்
தொடர்ந்து உயர்ந்து வந்துள்ளது. மார்ச் மாதத்தில் 143 ஆகவும், ஏப்ரலில்
143.5 ஆகவும், மே மாதத்தில் 144 ஆகவும் அதிகரித்துள்ளது. இந்த நிலையான
ஏற்றத்தைக் கருத்தில் கொண்டு, ஜூலை 2025 முதல் அகவிலைப்படியில் (DA) 4%
முதல் 6% வரை உயர்வுக்கான வாய்ப்புகள் உள்ளன. தற்போது மத்திய அரசு
ஊழியர்களுக்கான அகவிலைப்படி 55% ஆக இருக்கிறது.
அகவிலைப்படி உயர்வு எப்போது அறிவிக்கப்படும்?
புதிய அகவிலைப்படி ஜூலை 2025 முதல் நடைமுறைக்கு வந்தாலும், வழக்கமாக
அரசாங்கம் செப்டம்பர்-அக்டோபர் மாதங்களில் பண்டிகைக் காலத்தை ஒட்டி
அறிவிக்கும். இந்த முறையும் அதே போல் நடக்க வாய்ப்புள்ளது
இந்த அறிவிப்பு
தீபாவளியை ஒட்டி வரலாம். இதுகுறித்து தொழிலாளர் பணியகம் மேலும் கூறுகையில்,
8-வது ஊதியக் குழுவின் கீழ் ஓய்வூதிய காலம் 12 ஆண்டுகளாக குறைக்கப்படும்
என்று எதிர்பார்க்கப்படுகிறது.
அகவிலைப்படி உயர்வு பின்னணி
அகவிலைப்படி உயர்வு குறித்த இறுதி முடிவு ஜூன் 2025-க்கான AICPI-IW தரவைப்
பொறுத்தே அமையும். இது ஆண்டு ஆகஸ்ட் தொடக்கத்தில் வெளியிடப்படும். ஜூன்
2025-இல் AICPI-IW குறியீட்டு 0.5 புள்ளிகள் உயர்ந்து 144.5-ஐ எட்டினால்,
12 மாத சராசரி AICPI சுமார் 144.17 ஆக அதிகரிக்கும். 7-வது ஊதியக் குழுவின்
ஃபார்முலாவின்படி இந்த சராசரியை சரிசெய்த பிறகு, மத்திய அரசு
ஊழியர்களுக்கான எதிர்பார்க்கப்படும் அகவிலைப்படி சுமார் 58.85% ஆக
இருக்கும்.
இது தோராயமாக 59% ஆக இருக்கும். இதன் விளைவாக ஜூலை 2025 முதல் 4%
அதிகரிப்பு இருக்கும். ஜூன் மாத குறியீட்டில் ஏற்படும் இந்த 0.5 புள்ளி
உயர்வு, முன்னர் திட்டமிட்டதை விட சற்று அதிகமான அகவிலைப்படி உயர்வுக்கு
வழிவகுக்கும்.
அகவிலைப்படி கடந்த 12 மாதங்களின் சராசரி AICPI-IW தரவைப் பயன்படுத்தி
கணக்கிடப்படுகிறது. இது 7-வது ஊதியக் குழுவின் பரிந்துரைகளின் அடிப்படையில்
தீர்மானிக்கப்படுகிறது. ஜனவரி முதல் மே வரையிலான புள்ளிவிவரங்கள்
பெறப்பட்டுள்ளன. மேலும் அவை 3% அதிகரிப்புக்கான அடிப்படையாகத் தெரிகிறது.
இப்போது ஜூன் மாத புள்ளிவிவரம் இறுதி அகவிலைப்படி உயர்வை தீர்மானிக்கும்.
அகவிலைப்படி (%) = [(கடந்த 12 மாதங்களின் CPI-IW சராசரி) - 261.42] ÷
261.42 × 100. இங்கே 261.42 என்பது குறியீட்டின் அடிப்படை மதிப்பு.
7-வது ஊதியக்குழுவின் நிறைவு மற்றும் 8-வது ஊதியக்குழு
ஜூலை-டிசம்பர் 2025-க்கான இந்த அகவிலைப்படி உயர்வு 7-வது ஊதியக்குழுவின்
கீழ் திட்டமிடப்பட்ட கடைசி உயர்வாக இருக்கும். ஏனெனில் இந்த ஆணையத்தின்
பதவிக்காலம் டிசம்பர் 31, 2025 அன்று முடிவடைகிறது. 8-வது ஊதியக்குழு ஜனவரி
2025-இல் அறிவிக்கப்பட்டாலும், அரசாங்கம் இன்னும் தலைவர் மற்றும் குழு
உறுப்பினர்களின் பெயர்களை அறிவிக்கவில்லை. அரசாங்கத்தின் விதிமுறைகள்
மற்றும் குறிப்புகள் (ToR) ஏப்ரல் மாதத்திற்குள் தயாராகி ஆணையம் செயல்படத்
தொடங்கும் என்று எதிர்பார்க்கப்பட்டது.
ஆனால் இதுவரை உறுதியான தகவல்கள் எதுவும் இல்லை. முந்தைய ஊதியக்குழுக்களின்
வரலாற்றைப் பார்த்தால், எந்தவொரு ஆணையத்தின் பரிந்துரைகளையும் செயல்படுத்த
18 முதல் 24 மாதங்கள் ஆகும். எனவே 8-வது ஊதியக்குழுவின் பரிந்துரைகள்
2027-க்குள் மட்டுமே செயல்படுத்தப்படும் என்பது ஏறக்குறைய
உறுதியாகிவிட்டது. அதாவது, மத்திய அரசு ஊழியர்கள் மற்றும் ஓய்வூதியதாரர்கள்
தற்போதைய அடிப்படை ஊதியத்தில் இன்னும் பல அகவிலைப்படி உயர்வுகளைப்
பெறுவார்கள், என்று எதிர்பார்க்கப்படுகிறது.
